Act 28 | MHL | STEP | Aria i unowiya urupep weesereya epa nain unuma wia nokaremkun yia maakemik, “Fain Malta mot-ke,” naemik.

Acts 28

Pol Malta owowa-pa ma miililina onak

1 Aria i unowiya urupep weesereya epa nain unuma wia nokaremkun yia maakemik, “Fain Malta mot-ke,” naemik. 2 Ne wi owow mua pun sira eliw akena yia onamik. Iir nain ipia oromi epa dabel onaiya wueya wi mukun maneka ururumep yia faremik, “Ekapep epia areka,” naap yia maakemik. 3 Ne Pol epia aawep fiirimep mukuna-pa wuak. Epia wuam-ikaeya ifa samora epia tepak-pa ikok mukun yoowa-ke aaweya baurarep urupemi Pol wapena-pa kuep sererep ikua. 4 Naeya wi owow mua-ke naap urufap wi-wieniw maemik, “Mua faa, mua-ko wia ifakimok-yon. O iiriw aasa-pa urupem-ikua nain umekak. Ne aakisa ifa kuok nain ikoka uminon.” 5 Ne Pol-ke wapena ofofeya ifa nain mukuna-pa orok, o me samor aawok. 6 Ne o wapena wiar ariminon-i e ewur akena uminon-i naep mokoka wuam-ikemik-na weetak. Wi epa maala akena naap arep ikok sira oko-ko wiar imenarinon naep urufamik-na weetak. Naeya maemik, “Mua fain inasin mua-ke,” naap maemik.

7 Ne epa ikemik nain miiwa kame okaiwi wiena mot urufow saria Publius naimik nain wiarik. Os-ke yia aaweya fofa arow o koora-pa wiar inem-ikemik. 8 Publius wiawi urom ikiwowa ne mia yoowa napuma nain aawep inep ikua. Ne Pol ekap wameiya-pa iimarep Mua Maneka faremi wapena ikiwosa iinan-pa wiar wueya napuma wiar sariarek. 9 Naap oneya urufap wi mot nain napum mua unowa o wiar ekapiwkin wia saliwak. Ne wi napuma sariarem-ikua. 10 Naapeya i yia tetaremi sira eliwa yia onam-ikemik. Ne iir oko-pa aasa oko aawep ikiwu naep onamkun maa enowa yia fiirimomamik, ikoka aasa-pa ikiwemi enowa naep.

Pol ikiwep Rom-pa fuunek

11 I mot nan ikemik, ipia epa weesereya ikiwiyen naemik. Ne wi Alesandria aasa pun nan ikua. Aas miira-pa inasin mua miikapura erup siraremik. Ne siiwa arow naap ikok aasa nain aawep ikiwemik. 12 Ikiwemi Sirakius owowa-pa fuunep fofa arow nan ikemik. 13 Ne nan ikok ikiwemi ifer maneka kame puukap oromi Regium owowa-pa fuunemik. Ne uurik ona ewar nainiw kireya i naap ikemik. Ne nainiw uurik ona ikiwep Puteoli owowa-pa fuunemik. 14 Ne owowa nan wi Kristen mua papako wia imenamkun, wis-ke feeke yiamiya ikeka yia naakiwkin sande kuisow wiamiya ikemik. 15 Nan ikemkun wi Rom Kristen mua meta yia miimap yia miira puuk-ekapemik. Ekapemi mua papako fofa epa Apius naimik nan yia arep ikemik, ne papako sesa wuap inimik koora nan yia arep ikemik. Koora nain unuma Koora Arow naimik. Ne i ikiwep fuunep Pol wi wia urufap kema tenep Mua Maneka faremi sira eliwa naakek.

Pol Rom owow maneka-pa opor eliwa wia wafuromak

16 Ne i wiamiya ikiwep Rom-pa fuunemik. Ne Pol-ke yo koora oko-ko imenap neeke inem-ikok sesa wuam-ikainen naek. Ne anim onoma wia maakeya eliw naakemik. Ne ami mua oko sesekiwkin o urufam-ikua. 17 Aria fofa arow naap weesereya Pol-ke wi Yuuda woos mua Rom-pa ikemik nain wia farep fiirimowa wuak. Wi ekapep wiam fiirimiwkin wia maakek, “Emar unowik, yo yiena Yuuda teeria sira samora me onam, ne yiena nembesir sira wuomakek nain-ko me puukam. Nain oram maneka Yerusalem-pa efa opap wi Rom anim onoma wapena-pa efa wuamik. 18 Yo efa nokarep weesereya pina-ko me onak, ifakimowa nain, naap maep efa iiraru naep onamik. 19 Yo koora-pa efa weeser-wuowa naiwkin wi Yuuda-ke weetak naemik. Ne yo kokor eram naep Siisar wiarik opora-pa efa wueka wia naakem. Naap wia maakemkun efa sesekiwkin fan ekapem. Nain yo me yiena Yuuda teeria opora-pa wia wuekam naep ekapem, weetak. 20 Yo sen onaiya ikem fain i Isrel mua unow onaiya mua eena maemi arewap ikaimik nain opora ariman wiar wuamkun opora-pa efa wuami seniw efa kaikamik. Naapeya yo nain muuta nia urufekam naep nia farem.” Naap wia maakek.

21 Naeya wis-ke maakemik, “I no opora nefa maemik nain wi Yuudia kame-pa ikemik nain parosifa-ko me wiar aawemik. Ne mua papako nan ikok urupemik nain pun no opora sira samora-ko nefa maiwkin me miimamik. 22 Ne i aakisa nena-ko aakuneya nefa miimiyen, moram owow unowa aakisa teeria no wiar ikon nain murarow opora nia onam-ikaimik.”

23 Ne fofa oko-pa wi kiiriw wiam fiirimowa nain fofa wuamik. Fofa neeke mua unow akena ekapep Pol koora-pa wiam fiirimemik. Fiirimiwkin o opora onoma wuak, uuriw akena aakunem-ikaeya ama oromi kokomarek. Neemi Mua Maneka pika kemena-pa wiar ikowa opor unowa nain pun wia maakek. Ne Moses sira wuomakek nain ne wi profet opora maemik nain onaiya wia kemapawami Yeesus maek, wi kema kirep Yeesus ookuk naep. O umep iikirami era yia eepomak nain wia nanaromak. 24 Ne wi papako makena-ke naep opora wiar opamik, ne papako wia, makena-ke me naemik. 25 Naemi wi-wieniw opora wenup wenup muninemi omanaru naep iikiramik. Naap oniwkin Pol opora silewami feenap wia maakek, “Iiriw Ewar Eliwa pepek niena nembesir wia maemi profet Aisaiya maakek, feenap,

26 ‘No ikiwemi emeria mua unowa feenap wia maake, “Ni maa miimowa miimowen, nain kema me aawowen. Maa urufowa urufowen nain onoma me amisarowen,” naap wia maake.
27 Moram wi teeria nain emina iiriw reenemik. Wi maa miimowa emina kekanemik ne mokoka pun iiriw oparep ikemik. Mokoka wilinep maa urufami, ifana wuap opora miimami kema pukekamik. Ne kema kirekamik-na yo eliw pina wiar iirarekam.’
(Aisaiya 6.9-10)

Ewar Eliwa-ke naap wia maek. 28 Aria naapeya ni amisareka naep maiyem, Mua Maneka pina yia iiraromami yia aawowa opor eliwa nain wi owow oko oko emeria mua iiriw wia maakemik. Wi eliw miimap opora opikuan.” 29 Pol-ke opora naap wia maakeya wi ikiwemi wi-wieniw aakunemi opora wiam fi-fienamik.

30 Aria Pol mokoma erup nan ikua. Koora oko sesa wuap nan inem-ikok uuwam-ikua. Ne mua unowa koora wiar ekapiwkin kemelap unowiya wia aawem-ikua. 31 Ne keker opowa marew Mua Maneka pika kemena-pa wiar ikowa opora nain wia maakemi yiena Maneka Yeesus Krais opora pun wia maakem-ikua. Ne mua kuisow uuwowa me wiar puukamik.